Zijwi, il-pittur Ġużeppi Caruana

Abstract

Ġużeppi Caruana kien pittur Malti li twieled iż-Żejtun lejlet il-Milied tal-1899 u sa minn ċkunitu wera talent qawwi għall-arti, influwenzat minn missieru li kien jaħdem fid-dekorazzjoni. Studja d-disinn ma’ Guże Duca u aktar tard sar alliev tal-pittur magħruf Lazzru Pisani, li għaraf fih kapaċità kbira u għenu jiżviluppa t-teknika tiegħu. Ta’ għoxrin sena mar jistudja Ruma fl-Accademia di Belle Arti u istituzzjonijiet oħra, iżda kellu jirritorna Malta minħabba problema serja f’għajnu li eventwalment wasslet biex tilef id-dawl minnha. Minkejja dan, baqa’ jaħdem bla heda, sar għalliem tal-Arti mad-Dipartiment tal-Edukazzjoni u wettaq bosta kummissjonijiet, speċjalment f’knejjes madwar Malta bħal ħaż-Żabbar u s-Siġġiewi. Ħadem għal madwar għaxar snin fuq il-koppletti u l-lunetti tal-knisja tas-Siġġiewi. Miet fl-14 ta’ April 1964 fl-età ta’ 64 sena, u baqa’ mfakkar mhux biss bħala artist dedikat iżda wkoll bħala bniedem umli u marbut ħafna mal-familja tiegħu.