L-onorifiċenza tal-bażilika u t-tribuna bażilikari

Abstract

L-artiklu jittratta l-istorja tal-onorifiċenza ta’ Bażilika Minuri mogħtija lill-Knisja tal-Isla wara l-inkurunazzjoni tal-istatwa tal-Bambina fl-1920, u r-rabta tagħha mal-bini tat-tribuna bażilikali. Wara li l-Vatikan ta dan it-titlu fl-1921, inbniet l-ewwel tribuna fuq disinn tal-perit Andrea Vassallo, b’ħidma u sagrifiċċju kbir mill-poplu Senglean. Din it-tribuna, b’artal papali u baldakkin imżejjen b’kolonni u anġli, kienet simbolu tal-ġieħ u l-privileġġi tal-Bażilika, iżda nqerdet fit-Tieni Gwerra Dinjija meta waqgħet il-koppla tal-knisja fl-1942. Wara l-gwerra, inbniet mill-ġdid it-tieni tribuna fuq disinn ta’ Vincenzo Bonello, b’artal tal-irħam, skulturi ta’ qaddisin u dekorazzjonijiet indurati bid-deheb. Din ġiet inawgurata fl-1964 u saret parti ċentrali tal-kult u l-liturġija fil-Bażilika, bħala espressjoni ta’ fidi, devozzjoni u ġenerożità tal-komunità Sengleana.