Il-battalja ta' Lepanto u Malta

Abstract

Dan l-artiklu jitkellem dwar il-Battalja ta’ Lepanto, li seħħet fis-7 ta’ Ottubru 1571, ftit snin wara l-Assedju l-Kbir ta’ Malta. Kienet waħda mill-akbar battalji navali ta’ dak iż-żmien bejn il-Lega Qaddisa (Spanja, Venezja u l-Papa) u l-Imperu Ottoman. Fil-battalja ħadu sehem mijiet ta’ bastimenti u aktar minn 60,000 ġellied fuq kull naħa. Il-ġlied kien qalil ħafna u f’qasir żmien mietu madwar 40,000 persuna, tant li l-baħar ġie deskritt bħala mimli bid-demm. Ir-rebħa tal-Lega Qaddisa kienet importanti ħafna għax waqqfet l-avvanz tal-Ottomani fil-Mediterran. Barra minn hekk, l-Assedju l-Kbir ta’ Malta għen indirettament għal din ir-rebħa, għax wera li l-Ottomani setgħu jiġu megħluba. Dan ta kuraġġ lill-istati Ewropej biex jingħaqdu kontra l-għadu komuni, u dgħajjef ukoll il-qawwa militari Ottomana minħabba t-telf kbir li sofrew f’Malta. L-artiklu ukoll juri kif din il-battalja baqgħet fil-memorja kulturali u storika, anke f’Malta, fejn kienet meqjusa bħala simbolu ta’ glorja u rebħa.