“Arani għarwiena bil-għadam iċekċek” : Doreen Micallef u l-écriture féminine

Abstract

F’din it-teżina nistħarreġ il-kunċett tal-kitba femminili — l-écriture féminine — u l-mod kif il-poeżija ta’ Doreen Micallef tista’ tinqara bħala eżempju ta’ din il-prattika li tiddekostruwixxi r-rappreżentazzjoni tal-mara u terġa’ toħloqha. Għażilt dawn il-poeżiji għax joqorbu lejn dak li t-teoristi jikkunċettwalizzaw bħala écriture féminine. Qabelxejn, ninvestiga l-karatteristiċi ewlenin tal-écriture féminine skont Hélène Cixous, Luce Irigaray u Julia Kristeva, b’enfasi fuq jekk din il-kitba għandhiex tissejjaħ femminili ladarba tista’ (almenu skont Cixous u Kristeva) tinkiteb mill-irġiel. Imbagħad, nesplora kif f’Micallef hemm tentattiv kontinwu biex jiġi stabbilit kuntatt mal-Ieħor, liema kuntatt juri l-paradoss bejn id-dominanza u s-sottomissjoni u jixħet dawl fuq il-problematika tad-differenzi sesswali fl-écriture féminine. Finalment, inħares lejn ir-relazzjoni intima bejn il-prekarjetà tal-kontenut u l-instabbilità tal-forma peress li Micallef ma tiktibx biex tinftiehem imma biex tqanqal. Għaldaqstant, il-qarrejja tagħha jeħtieġu attenzjoni akuta, li tinbena gradwalment, lejn il-frammentazzjoni, il-fluwidità u l-illoġiċità tat-teknika.