L-għoti tal-ġens grammatikali lill-ismijiet tad-ditti tal-vetturi

Abstract

Din it-teżi tkompli tagħti kontribut lill-kategorija grammatikali tal-ġens, partikolarment fl-assenjazzjoni tal-ġens lill-ismijiet tad-ditti tal-vetturi. L-istudju jitlaq minn qafas teoretiku dwar il-ġens grammatikali b’attenzjoni partikolari lejn il-fatturi li jinfluwenzaw dan il-proċess, ngħidu aħna, il-kriterji semantiċi u formali. Permezz ta’ kwestjonarju strutturat u għadd ta’ intervisti, ir-riċerka tanalizza l-mod kif il-kelliema jassenjaw il-ġens lil dawn l-ismijiet u x’jiddetermina l-għażliet tagħhom. Ir-riżultati juru li l-varjabbli soċjali għandhom influwenza limitata, filwaqt li elementi bħall-analoġija semantika u d-dehra tal-vettura jidhru iktar influwenti. Barra mill-fatt li tispikka preferenza ġenerali lejn il-ġens femminili f’dan il-qasam, kienu ftit iktar minn nofs in-nomi studjati (51.7%) li nstab li għandhom ġens stabbilit fil-Malti, fosthom l-iperonimu trakk u l-isem Fiat 500.