Il-pajsaġġ lingwistiku Malti : passiġġata fit-triq u mixja maż-żmien

Abstract

F'din il-kontribuzzjoni nagħti ħarsa lejn il-pajsaġġ lingwistiku, studju li bl-Ingliż huwa magħruf bħala linguistic landscape. Niffoka fuq Malta u Għawdex, u b'mod partikolari nistudja l-ismijiet tad-djar. It-terminu 'pajsaġġ lingwistiku' jirreferi għall-kitbiet, normalment qosra ħafna, li naraw fit-toroq, fil-pjazez, u f'postijiet pubbliċi oħra. Din il-kitba l-iktar li nsibuha f'forma ta' ismijiet ta' djar u ħwienet, tabelli b'informazzjoni varja, reklami, lapidi kommemorattivi, twissijiet, u avviżi. F'dan l-artiklu nikkonsidra dak li diġà nkiteb dwar il-pajsaġġ lingwistiku Malti, fejn l-aktar li ngħatat attenzjoni kien lejn liema elementi ta' lingwa u kultura jinkixfu bis-saħħa tiegħu. Pereżempju, nafu li s'issa l-aktar li jintuża huwa l-Ingliż, għalkemm insibu ħafna ismijiet ta' ħwienet u avviżi li fihom jintużaw kemm il-Malti kif ukoll l-Ingliż flimkien. L-ismijiet tad-djar u tal-ħwienet jifthu tieqa interessanti ferm fuq il-bilingwiżmu f'Malta, u dwar l-użu simboliku tagħhom u ta' lingwi oħrajn. Nagħti idea ta' xi bidliet lingwistiċi u kulturali li nistgħu ninnutaw permezz tal-istudju tal-pajsaġġ lingwistiku. Nieħu l-eżempju ta' żewġt irħula, l-Imġarr f'Malta u Ta' Sannat f'Għawdex biex nidħol fid-dettall permezz ta' ftit statistika dwar l-ismijiet tad-djar, u nagħti stampa minn tliet perjodi differenti, jiġifieri mill-1970, l-1994 u l-2022-2023. Minn perjodu għall-ieħor fl-ismijiet tad-djar ninnutaw kif id-drawwa ssaħħet u kien hemm żieda fl-użu tal-Malti, u tnaqqis fl-ismijiet devozzjonali. Nafu wkoll li d-drawwa li nagħtu isem lid-dar tagħna tant hi magħġuna fil-Maltin, li anke fi blokka appartamenti, apparti n-numru u l-isem tal-blokka, hemm min jagħti isem lill-appartament tiegħu, speċjalment jekk ikun joqgħod f'maisonette jew f'penthouse.