Marta u Marija fl-Evangelju skont San Gwann

Abstract

L-istudju tal-karattri fil-letteratura huwa l-arti u t-teknika li bihom nagħrfu kif l-awtur ifassal ritratt ta’ persuna fil-kitba tiegħu. Dan ir-ritratt joħroġ aktar ċar b’dak li l-awtur jgħidilna fuq il-persuna permezz tal-kliem u l-azzjonijiet, u permezz ta’ kif persuni oħra fl-istorja jwieġbu għal din il-persuna. Fattur importanti ħafna tal-istudju tal-karattri fl-Evanġelju skont San Ġwann huwa l-mod kif il-karattri li jissemmew f’din in-narrativa jwieġbu għal Ġesù. Il-mod kif l-Evanġelista jiżviluppa din il-ħaġa twassal sabiex nifhmu aħjar l-għan li għalih inkiteb dan l-Evanġelju: “Hemm ħafna sinjali oħra li Ġesù għamel quddiem id-dixxipli tiegħu …. iżda dawn inkitbu sabiex intom temmnu li Ġesù hu l-Messija, l-Iben ta’ Alla, u biex bit-twemmin tagħkom ikollkom il-ħajja f’ismu” (Ġw 20:30-31).