Il-gustizzja ta' Alla u s-salvazzjoni

Abstract

L-ittra ta’ San Pawl lir- Rumani ġiet miktuba aktarx f ’Korintu fit-xitwa ta’ bejn is-snin 57 u 58 W.K., fit-tielet vjaġġ missjunarju, qabel ma huwa reġa’ lura lejn Ġerusalemm fejn ġie arrestat u mixħut fil-ħabs, u għalhekk żgur qabel ma mar Ruma fejn għadda wkoll minn Malta. Hija miktuba lill-komunità nisranija ta’ Ruma, il-belt kapitali tal-Imperu Ruman, komunità waħda kbira magħmula mhux biss mil-Lhud ikkonvertiti imma wkoll minn ħafna Ġentili kkonvertiti. Huwa jurihom ix-xewqa kbira li jgħallimhom huwa ukoll dwar il-fidi ta’ Kristu u l-Evanġejlu bl-inkarigu li huwa rċieva tal-missio ad gentes: “Jien inħoss ruħi obbligat lejn il- Griegi u Barbari, għorrief u m’humiex, għalhekk ninsab ħerqan li nxandar l-Evanġelju lilkom ukoll, li tgħammru f ’Ruma” (1:14- 15). Hija ittra mill-iktar solenni u li kellha influwenzi kbar fit-tagħlim tal-Knisja. Hija l-itwal ittra ta’ San Pawl u fiha sittax-il kapitlu. L-ittra twasslet lill-insara ta’ Ruma minn Febe li kienet djakonessa tal-knisja ta’ Kenkre (ara Rum 16:1).