Il-Ktieb ta' Bin Sira

Abstract

Dan huwa wieħed mill- Kotba tal-Għerf li huwa importanti ħafna. Tant kien importanti fil-bidu tal-Knisja li kien jintuża fil-katekeżi u fit-tagħlim morali. Fih tagħlim għal kull persuna ta’ kull età speċjalment għaż-żgħażagħ biex isibu l-gwida tat-tagħlim f ’ħajjithom. Dan il-ktieb tal-knisja kien jintuża ħafna fil-liturġija speċjalment fil-liturġija tal-kelma ta’ Alla, u użat fl-istruzzjoni lill-katekumeni. U għalhekk jissejjaħ ukoll bl-isem tal-Ekklesjastiku, liber Ecclesiasticus kif sejjaħlu San Ċiprijanu f ’nofs it-tielet seklu. Il- Lhud isejħulu Sefer Musar għaliex iħarsu lejh bħala ktieb tad-dixxiplina. Il-ktieb huwa msejjaħ għan-nannu tal-awtur li kien jismu ‘Sira’; bil-Lhudi: ‘Sira’ u bil-Grieg ‘Sirach’ u għalhekk fil-Malti ‘Sirak’, iżda fl-oriġinal huwa ‘Sira’. Il-Lhud u l-Protestanti ma aċċettawhx bħala ktieb ispirat.