Ir-rabta tal-Missier u l-Iben fl-Evangelju skont San Gwann

Abstract

Waħda mill-mistoqsijiet kbar fl-istudji tal-Evanġelju skont San Ġwann hija jekk għandniex nippruvaw nifhmu dan l-Evanġelju b’mod Kristoloġiku jew inkella b’mod Teoloġiku. F’kelma oħra, minħabba li dan l-Evanġelju huwa tant iffokat fuq il-preżentazzjoni tal-persuna ta’ Ġesù bħala l-Iben ta’ Alla, fl-istudju ta’ dan l-Evanġelju tibqa’ l-mistoqsija jekk għandniex nibdew mill-figura ta’ Ġesù biex permezz tiegħu nkunu nistgħu nħarsu lejn il-Missier, jew inkella għandniex nibdew millpreżentazzjoni tal-figura ta’ Alla l-Missier u l-imħabba tiegħu li ntweriet lilna meta bagħat lill-Ibnu fid-dinja. Dan l-artiklu se jikkonċentra fuq din il-kwestjoni fundamentali fin-narrativa tar-Raba’ Evanġelju.