Ir-restawr tal-Edikola tal-Qabar ta' Kristu

Abstract

It-Tlieta 22 ta’ Marzu saret ċerimonja qasira quddiem l-Edikola tal-Qabar ta’ Kristu fil- Bażilika tal-Qabar ta’ Kristu f ’Ġerusalemm. Waqt din iċ-ċerimonja deher il-Patrijarka Grieg Ortodoss Theophilos III imdawwar mill-Kustodju tal-Art Imqaddsa, dak iż-żmien P. Pierbattista Pizzaballa ofm (illum Arċisqof u Amministratur Apostoliku tal-Patrijarkat Latin ta’ Ġerusalemm) u mill- Patrijarka Armen Ortodoss Nourhan Manougian. Magħhom kien hemm it-tliet superjuri rispettivi tat-tliet komunitajiet li jamministraw il-Bażilika, u l-Professoressa Antonia Moropoulou, l-inkarigata min-National Technical University of Athens (NTUA), li ħadet ħsieb tippreżenta r-riżultati tal-istudju multidixxiplinari li sar ftit xhur qabel fuq l-Edikola. Dan l-istudju kien ġie konkluż wara qbil mill-komunitajiet rispettivi biex jirrestawraw din l-Edikola, li tinsab fi stat prekarju ħafna, u kien ġie ppreżentat uffiċjalment f ’Ateni quddiem l-awtoritajiet konċernati u r-rappreżentanti tal-Gvern Grieg.