L-Imperatur Kostantinu u l-Art Imqaddsa

Abstract

Fix-xitwa tas-sena 313, wara li ħalla Ruma, Kostantinu mar lejn Milan biex jiltaqa’ mal-Awgustu l-ieħor, Licinio. F’dik l-okkażjoni, barra miż-żwieġ bejn Licinio u Kostanza, oħt Kostantinu, iż-żewġ Awgusti kellhom mod kif jivvalutaw dak kollu li kien jaqbel għallfutur ta’ strateġija politika u għall-istess sigurtà tal-imperu. Fil-kuntest ta’ dawn it-taħdidiet l-Awgusti qablu dwar pożizzjoni komuni li kellhom jieħdu fil-konfront tal-Kristjaneżmu. Skont opinjoni komuni kien waqt din il-laqgħa li ħareġ il-famuż Editt ta’ Milan, dokument li kellu jirregolarizza l-qagħda tal-Kristjaneżmu flimperu. Din is-sena qegħdin infakkru l-1700 anniversarju ta’ dan l-Editt li biddel l-istorja. Fil-fatt ma waslilna l-ebda dokument tal-editt li ħareġ ġewwa Milan, imma hemm biss żewġ kopji li kienu ppubblikati fl-Orjent minn Licinio, wieħed f’Nikomedja u l-ieħor f ’Cesarija tal-Palestina, u li jagħtuna ħjiel dwar dak li ftiehmu fuqu ż-żewġ imperaturi fil-laqgħa ta’ Milan.