ls-Sistema Edukattiva ta' Dun Ġwann Bosco

Abstract

Fil-kapitlu preċidenti meta konna qegħdin nirrakkontaw l-istorja ta' kif inbena l-oratorju Qalb ta' Ġesu li għandna llum, kemm-il darba għamilna referenzi diretti għall-influwenza li kellha s-sistema pedagoġika li ħoloq Dun Ġwann Bosco fuq il-pjanta u l-faċilitajiet tal-Oratorju fil-Mosta. Il-loġika ta' dan il-qaddis Taljan, ħabib tat-tfal u ż-żgħażagħ, hija s-sies tar-raġuni għaliex l-oratorju huwa propju mfassal u mibni kif inhu: bil-kappella, il-klassijiet, it-teatru u l-grawnd tiegħu. Kollox miġbur taħt saqaf wieħed minn fejn iż-żgħażagħ Mostin, min-nofs it-tletinijiet 'il quddiem, ħadu l-aqwa formazzjoni biex jikbru bħala nsara maturi u ċittadini attivi. Għalhekk huwa tajjeb li f' dan l-istadju ieqfu ftit mill-mixja kronoloġika ta' kif żviluppa l-oratorju fil-Mosta u niffokaw fuq il-prinċipji li fuqhom inbena, tħaddem u tmexxa sa mis-snin bikrija tiegħu. Hawn mhux se nirrispondu għal mistoqsijiet bħal 'Min għamel xiex?', jew inkella, Meta sar xiex?'. B'differenza, issa se nippruvaw inwieġbu għad-domanda, 'Għaliex?'. Għaliex l-ħajja fl-Oratorju kellha u għad għandha l-potenzjal li sservi ta' kalamita għaż-żgħażagħ? Għaliex ssir daqstant enfasi fuq id-drama, il-mużika u l-isports f'ambjent primarjament reliġjuż? Għaliex konna nħobbu mmorru hemm? Għaliex għad għandna nostalġija kbira għal żgħożitna fl-Oratorju?