Ċaqliqa għal Triq il-Parroċċa

Abstract

F'dan il-kapitlu se nitrattaw iċ-ċaqliqa għat-tieni post li laqa' l-oratorju fil-Mosta. Wara kważi tmien snin stabbilit f'dar fi Triq il-Kungress Ewkaristiku, l-oratorju ġarr għal dar antika oħra fiż-żona ta' wara l-knisja arċipretali, eżattament fi Triq il-Parroċċa. Din kienet id-dar ta' Dun Feliċ Calleja, il-kappillan qalbieni li mexxa t-truppi Mostin matul iż-żmien tal-imblokk kontra l-Franċizi f'Malta (1798-800) u l-istess wieħed li beda I-proċess għall-bini tar-Rotunda, tant li ħalla ġidu kollu għal dan il-proġett. L-Oratorju baqa' hawn għal snin mhux ħażin sakemm f'nofs it-tletinijiet beda jġorr għall-bini kbir u sabiħ, kifu fejn nafuh illum fi Pjazza Oratorju. Matul is-snin li dam fi Triq il-Parroċċa saru diversi żviluppi li se nkunu qegħdin nittrattawhom f'din il-parti, speċjalment it-tisħiħ tat-tagħlim tal-katekiżmu, it-tluq tal-iscouts għal kwartier ieħor, il-formazzjoni tal-ewwel orkestra parrokkjali u l-ingaġġ ta' Dun Karm (Carmelo) Sciberras bħala d-Direttur il-ġdid. Iżda qabel ngħaddu biex nidħlu f'iżjed dettall dwar dawn il-punti, ikun f'loku jekk l-ewwel nagħtu ħarsa ġenerali lejn il-qagħda politika, soċjali u ekonomika tal-Maltin immedjatament wara li spiċċat l-ewwel gwerra. Dan it-tagħrif introduttorju jgħina biex nifhmu aħjar l-isfond storiku nazzjonali li fih ittieħdu sensiela ta' deċiżjonijiet parrokkjali.