Perjodu ta' Tranżizzjoni mal-Qalba tal-Millennju

Abstract

Iż-żmien ma jistenna lil ħadd. Bil-ħidma ta' tant għaqdiet li kienu joperaw fl-Oratorju Qalb ta' Ġesu u bix-xita ta' attivitajiet li kienu jkunu organizzati f'kull staġun tas-sena, is-snin għaddew u taru, u ġabuna wiċċ im'wiċċ mas-snin elfejn. L-affarijiet laħqu nbidlu, l-istess bħal ma tbiddlu l-gosti, u magħhom il-moda, il-prioritajiet u n-nies involuti. L-iskop ta' dan il-kapitlu huwa li naraw x'ġara fl-Oratorju wara li Dun Anġ Camilleri kellu jirtira minħabba saħħtu fil-bidu tas-snin elfejn. Fi żmienna wkoll l-istorja u l-istejjer ta' dan iċ-ċentru komplew jiġġeddu u jiġġeneraw oħrajn ġodda. B'mod partikolari se ninkwadraw il-bidliet u l-iżviluppi li seħħew fl-Oratorju mill-2005 sa meta ġejna biex nippubblikaw dan il-ktieb. Imma qabel nibdew niffukaw fuq hekk, ikun tajjeb jekk l-ewwel nixħtu dawl fuq l-istil u r-ritmu tal-ħajja kontemporanja tal-lum. Dan għandu jgħina biex nifhmu xi ftit aħjar l-isfidi mhux żgħar għal min għadu impenjat biex jixhed għall-fidi nisranija fil-ħajja pubblika, aktar aktar jekk ikun involut fl-appostolat fost it-tfal u ż-żgħażagħ.