Esposizzjoni dwar Lord Strickland : 1861-1940

Abstract

Mingħajr ebda dubju, LORD STRICKLAND huwa wieħed mill-protagonisti l-iktar prominenti fl-istorja kostituzzjonali, politika u soċjali ta' żmien il-ħakma Ngliża f'Malta. Għal iżjed minn nofs seklu, STRICKLAND kellu sehem importanti fl-iżvilupp kostituzzjonali u politiku ta' pajjiżna, kif ukoll fit-twettiq ta' diversi proġetti ta' l-akbar fejda fil-qasam soċjali u edukattiv tal-ħajja Maltija ta' żmienu. Bir-rispett kollu għal kull opinjoni diversa u minkejja li wħud jistgħu jaqblu jew ma jaqblux mal-fehmiet politiċi tiegħu, jibqa fatt assolut li bħala mexxej politiku u amministratur, STRICKLAND wera li kien tabilħaqq bniedem ta' ħila u kuraġġ liema bħalu, qatt ma ħabbel rasu jieħu deċiżjonijiet li fil-ġudizzju tiegħu deherlu li kienu meħtieġa u xierqa fiċ-ċirkostanzi li sab ruħu fihom, ukoll meta dawn kienu forsi kontroversjali jew swewlu sagrifiċċju personali, u fuq kollox dejjem ġab ruħu ta' kattoliku konvint u ġentlom li bil-ħidma u bl-imġieba tiegħu ma' tul il-karriera brillanti tiegħu, kemm f'Malta kif ukoll barra minn xtutha, għamel unur mhux biss lill-familja distinta tiegħu, iżda wkoll irnexxielu jikseb ġieh mill-aqwa għal art twelidu.