Is-servizzi soċjali fis-Siġġiewi : meta u kif bdew

Abstract

Sa tmiem is-seklu tmintax , meta telqu l-Kavallieri minn Malta, ma kien jeżisti l-ebda servizz organizzat biex iħares u jkun ta' wens għall-poplu ta' pajjiżna - kien hemm biss xi ftit sbirri li kienu jinħatru mill-Ħakem jew mill-Kavallieri, imma dawn ftit li xejn kienu ta' wens għall-missirijietna. Meta l-Ingliżi ħadu f'idejhom l-amministrazzjoni ta' dawn il-Gżejjer, il-Gvernatur Sir Thomas Maitland, permezz tal-Ordinanza XXII ta' Lulju 1814, waqqaf l-ewwel Korp tal-Pulizija ġewwa Malta. Imma ġara, li sa nofs l-istess seklu, dan il-Korp ma tantx biddel għall-aħjar is-sitwazzjoni ta' sigurtà fil-pajjiż. Kien fis-sena 1849 li ġie organizzat kif imiss il-Korp taħt it-tmexxija tas-Sindku ewlieni li, allura, kien maħtur l-Uffiċjal Prinċipali tal-Pulizija Kien dak iż-żmien meta nfetħu 40 għassa fl-irħula ta' Malta u Għawdex'. Is-Siġġiewi issa kellu l-għassa tiegħu f 'Nru 67 Misraħ San Nikola, fejn tpoġġew 4 kuntestabbli u surġent. Illum flok dik l-għassa hemm Dar Omna Marija u l-għassa preżenti tinsab f 'parti mill-bini tal-Kunsill Lokali fl-istess pjazza.