Santa Venera : ġrajjiet u tifkiriet

Abstract

Ir-rabta tiegħi ma' Santa Venera u l-festa tmur lura fi żmien l-ewwel snin ta' tfuliti. Minn ċkuniti ġa kienet tinħass il-ġibda għall-festi tradizzjonali. Kelli mudell ta' knisja fil-minjatura u f'kull okkażjoni kont inżejjen u narmaha skont il-festi l-aktar favoriti tiegħi. Missieri kien jgħini nixtri l-vari tat-tafal, it-tiżjin għal fuq l-artal miksi b'karti irħamati biex jidher naturali. Niftakar darba waħda ħadni f'ras il-għajn nhar festa filgħodu fejn stajt nara għażla ta' figuri u ornamenti oħra għat-tiżjin tal-knisja tiegħi. Konna qbadna l-karozza tal-linja u waqafna qrib il-knisja ta' San Ġużepp fi Strada Rjali tal-Ħamrun kif stajt nifhem dak iż-żmien. Iżda ma kienx hekk. Qalli ġibtek Santa Venera fejn jintrama suq differenti minn dak ta' Fuq il-Monti.