Traduzzjoni u analiżi ta’ xi kapitli mill-ktieb ‘Diarios de Motocicleta’ ta’ Ernesto Guevara

Abstract

L-għan prinċipali ta’ dan ix-xogħol hu li jiġu tradotti siltiet mill-ktieb 'Diarios de Motocicleta: Notas de viaje por América Latina' ta’ Che Guevara, mill-Ispanjol għall-Malti. Fit-traduzzjoni kemm jista’ jkun possibbli ser jitwasslu l-istess messaġġi, effetti u deskrizzjonijiet lill-qarrej tal-lingwa fil-mira, jiġifieri tat-test tradott. Sabiex dan l-iskop jintlaħaq b’suċċess, it-test sors ried jinqara kollu u għal diversi drabi sabiex it-traduttur jeliċita kull tifsir. Fl-ewwel kapitlu ta’ din id-dissertazzjoni tingħata ħarsa ġenerali lejn it- traduzzjoni letterarja b’rabta mal-ġeneru tad-djarju. Tingħata wkoll deskrizzjoni u introduzzjoni għall-karattru rivoluzzjonarju ta’ Che Guevara u l-ktieb tiegħu Diarios de Motocicleta: Notas de viaje por América Latina. Fit-tieni kapitlu tingħata spjegazzjoni iktar fil-fond tal-għan ta’ dan ix-xogħol b’rabta mat-teoriji ta’ Reiss,Vermeer u Umberto Eco. Aktar tard fil-kapitlu nidħlu aktar fil-qrib u nitkellmu dwar it-traduzzjoni letterarja f’Malta kif ukoll dwar l-influwenza tal-kultura u l-lingwa Spanjola f’Malta. It-tielet kapitlu huwa x- xogħol ewlieni ta’ dan l-istudju. Dan il-kapitlu jinkludi fih it-traduzzjoni tal-ewwel seba’ siltiet tal-ktieb u tal-aħħar żewġ siltiet, kif ukoll sommarji tas-siltiet mhux inklużi fit- traduzzjoni. L-isfidi li nqalgħu matul il-proċess tat-traduzzjoni ser jiġu mniżżlin fin-noti f’qiegħ il-paġna u magħhom ser ikun hemm ukoll spjega tad-deċiżjonijiet li ttieħdu. It- traduzzjoni tal-kapitli magħżula ser tkun ippreżentata f’forma parallela, sabiex wieħed ikun jista’ faċilment iqabbel it-test sors mat-test mira. Wara t-traduzzjoni ser ikun hemm kapitlu ddedikat għall-analiżi, fejn ser jiġu elaborati u spjegati iktar fil-fond dawn in-noti u kif ukoll ir-riċerka li saret.