Id-difna ta' qalb il-Granmastru De Rohan fil-Knisja ta' San Pawl

Abstract

Il-Knisja Kolleggjata Parrokjali ta' San Pawl Nawfragu fil-qalba tal-Belt Valletta, mhux biss storikament kellha rabta speċjali ma' l-iżvilupp storiku, soċjali u industrijali tal-belt kapitali tagħna, iżda wkoll ma' l-Ordni Sovran ta' San Ġwann. Sa mill-bidu li l-Ordni ta' bidu għall-bini tal-belt il-ġdida sakemm l-Ordni ġie biex iħalli Malta, dejjem wera għozza u apprezzament speċjali lejha. Mhux ta' b'xejn li l-Granmastri ta' l-Ordni ta' San Ġwann matul is-snin ma naqsu qatt li jgħinuha, isebbħuha, iżejnuha u jużaw l-influwenza u l-awtorita tagħhom bħala slaten ta' din il-gżira biex jiksbulha drittijiet u privileġġi. Il-knisja pawlina baqgħet tgħożż b'rispett kbir it-tifkira tal-Granmastru Fra Emanuel de Rohan Polduc. L-Kapitlu tal-Kolleggjata ta' San Pawl tant ħabbu u baqa' jirrispettah għal dan kollu li kien għamel miegħu li hekk kif tħabbret il-mewt tiegħu, f'laqgħa urġenti ddeċieda li jagħmel rikors lill-Kunsill ta' l-Ordni li fih talbu biex il-qalb tal-Gran Mastru De Rohan tiġi midfuna fil-knisja ta' San Pawl.