Il-Mazzarell

Abstract

Fost l-insetti li niltaqgħu magħhom jittajru fil-baxx f’xi xi wied fejn jinġemgħa l-ilma tax-xita, hekk kif jibda jaqleb it-temp minn nofs ir-Rebbiegħa, tul is-sajf sa l-Ħirifa, insibu l-Mazzarelli jew Ċikkuġwiebi kif jissejħu f’xi postijiet ta’ Malta. Dawn l-insetti, flimkien mad-Damiġelli (Damselflies) jagħmlu parti mill-Ordni magħrufa bħala Odonata. In-numru ta’ speċi, f’din l-Ordni ilaħħaq madwar erbat elef u tmien mija; il-parti l-kbira ta’ dawn meqjusa bħala nsetti pjuttost primittivi. Dan jidher l-aktar meta wieħed iqis l-istorja u l-iżvilupp tagħhom. Instabu fossili ta’ madwar 265 miljun sena (Permian Period) li juru li ma kienx hemm wisq bidla fl-għamla ġenerali ta’ dawn l-insetti matul iż-żminijiet.