Kalafrana f’għeluq il-100 sena mill-bidu tal-Ewwel Gwerra Dinjija

Abstract

Din is-sena jaħbat għeluq il-mitt sena mill-bidu tal-Ewwel Gwerra Dinjija li baqgħet magħrufa bħala l-Gwerra l-Kbira (1914-1918). Għalkemm f'din il-Gwerra Malta qatt ma ġiet attakkata, pero’ xorta waħda kellha rwol importanti, kemm bħala sptar għall-fejqan tal-korruti u l-morda kif ukoll permezz ta' diversi Maltin li taw sehemhom kemm fil-Flotta Ngliża u anke fl-Armata Ngliża. Tajjeb ingħidu li diversi Maltin iġġieldu fil-kampanji famużi ta' Gallipoli u d-Dardanelli. Barra minnhekk, il-pożizzjoni strateġika ta' Malta f'nofs il-Mediterran fissret użu totali tal-gżira fil-qadi tad-dmirijiet tal-Gwerra, biżżejjed insemmu li f'dan iż-żmien, it-Tarzna kienet tħaddem 'l fuq minn 14,000 ruħ. Madankollu din il-gwerra kellha tkun ir-raġuni li wasslet sabiex s-Servizzi Ingliżi f'Malta jinvestu iktar fil-faċilitajiet militari tagħhom f'Malta, u hawn fejn tidħol il-bajja kennija ta' Kalafrana, liema bajja ġiet sfruttata mill-Forzi Ngliżi propju bħala riżultat tal-Ewwel Gwerra Dinjija.