Il-ġuspatronati ekkleżjastiċi fil-Għasri

Abstract

Il-flus mhumiex kollox fil-ħajja, iżda bla flus, igħid il-Malti, la tgħannaq u lanqas tbus. Jiġifieri qajla tista' tagħmel ħwejjeġ jekk ma jkollox il-boqxiex. Jekk dan igħodd għall-individwu, igħodd ukoll għall-knisja. Fi żmien li f'Malta u Għawdex kien hawn faqar kbir, anki l-knejjes kienu mneżżha minn kollox. Mhux qegħdin ngħidu għal fided u deheb, iżda għal ħwejjeġ inqas prezzjużi u li mingħajrhom wieħed qajla igħaddi. Konxji minn dan, xi sinjuri u benestanti kienu fit-testment tagħhom iħallu xi biċċa raba' jew proprjeta' immobbli oħra biex mill-qligħ li jsir mill-kiri tagħhom ikunu jistgħu isiru t-tiswijiet meħtieġa fil-kappelli u fl-istess waqt isir xi quddies u talb għal ruħhom. Tal-għotja tagħhom il-knisja kienet tagħti lill-fundatur u lill-werrieta tiegħu ċerti drittijiet bħal, ngħidu aħna, li jagħżlu huma l-persuna biex tamministra l-proprjeta'; li jagħżlu huma l-qassis li kellu itemm il-piżijiet spiritwali tal-fundazzjoni; u li kellhom dritt jieħdu lura l-proprjeta', jekk il-kundizzjonijiet ma jkunux mitmuma skond ix-xewqa tagħhom.