Din it-taqsima tappartjeni għall-Pjan Strateġiku 2020-2025, li jestabilixxi l-għanijiet u l-prijoritajiet tal-Università, il-fakultajiet, id-dipartimenti, iċ-ċentri, l-istituzzjonijiet u l-iskejjel tagħha.
|
L-Istrateġiji Biex Nilħqu l-Għanijiet |
L-Impenji |
|
|
L-Università ta’ Malta hi impenjata li tipprovdi esperjenza ta’ livell għoli lill-istudenti fi ħdan ambjent akkademiku ispiranti u motivanti bl-għan li ntejbu t-tagħlim u l-prestazzjoni tal-komunità gradwata tagħna. Nifhmu li l-istudenti li jingħataw għajnuna akkademika u soċjali u li jipparteċipaw fil-ħajja tal-kampus, jiksbu iżjed fl-istudji u l-karriera tagħhom. Se nżidu l-attenzjoni tagħna fuq it-titjib tal-esperjenza tal-istudenti f’firxa ta’ fatturi, li jinkludu s-sikurezza, is-saħħa, is-sigurtà, il-benesseri fiżiku u psikoloġiku, u l-involviment soċjali.
Li nipproteġu l-istudenti u niggarantixxu li jirċievu esperjenza edukattiva komprensiva u pożittiva huwa l-qofol tal-istrateġija tal-Università. Huwa essenzjali għalina li nidentifikaw il-ħtiġijiet partikolari ta’ gruppi speċifiċi ta’ studenti u li noħolqu attivitajiet li jintegraw l-istudenti internazzjonali u domestiċi u l-istudenti bi sfondi soċjali, ekonomiċi u kulturali differenti. L-integrazzjoni tal-istudenti fil-komunità tal-kampus hija importanti għall-istudenti b’diżabilità u għal dawk li qed jistudjaw b’mod remot fi programmi elettroniċi u fi skambji jew apprentistati ma’ istituzzjonijiet internazzjonali.
Hija r-responsabbiltà tagħna li noħolqu kultura intellettwali u soċjali fi ħdan ambjent ta’ riċerka b’varjetà ta’ programmi ekstrakurrikulari. L-istudenti u r-riċerkaturi jeħtieġu spazji flessibbli ta’ tagħlim li jwasslu għall-produttività u għal ekosistema ta’ għajnuna. Is-sikurezza, is-sigurtà u l-benneseri tal-istudenti huma prerekwiżiti importanti biex nilħqu l-għanijiet tal-Università, u se nkomplu nfittxu li niżviluppaw is-servizzi ta’ għajnuna għall-istudenti fuq il-kampus.
L-Università se tara li tkun ċara dwar l-irwoli, l-obbligi tar-rappurtaġġ u l-konfini tas-servizzi, billi tagħraf id-drittijiet u r-responsabbiltajiet tal-istudenti u tipprovdi għażliet li jħaddnu l-parteċipazzjoni tal-istudenti. Li nibnu ekosistema ta’ għajnuna għall-istudenti hija impriża kollaborattiva li tinvolvi ħafna oqsma tal-komunità akkademika, amministrattiva u studenteska tal-Università. Billi tipprovdi esperjenza edukattiva komprensiva u sħiħa lill-istudenti tagħna, l-Università tiżgura li taqdi l-aġenda ta’ kwalità tagħha, li biha l-pajjiż u l-gradwati tagħha jibqgħu f’vantaġġ kompetittiv.