Tema Strateġika III. Il-Fatturi Soċjali u l-Impatt Tagħhom

Noħolqu Università Inklużiva għal Soċjetà Inklużiva

“Il-Fatturi Soċjali u l-Impatt Tagħhom” hija waħda mit-Temi Strateġiċi tal-Pjan Strateġiku 2020-2025, li testabilixxi l-għanijiet u l-prijoritajiet tal-Università, il-fakultajiet, id-dipartimenti, iċ-ċentri, l-istituzzjonijiet u l-iskejjel tagħha.

L-Università ta’ Malta tħeġġeġ lis-soċjetà tkun parteċipattiva b’tali mod li l-intellettwali jkollhom irwol sinifikanti fil-ħajja soċjali, politika, ekonomika u kulturali tal-pajjiż. L-Università hija istituzzjoni inklużiva li tistinka biex tgħin lill-komunità tagħna, kemm fi ħdan l-Università stess kif ukoll fis-soċjetà inġenerali, bl-involviment tal-istudenti u l-istaff. Għandna l-għan li nqanqlu r-responsabbiltà pubblika u li attivament nispiraw il-kunċett ta’ servizz pubbliku biex jiġu identifikati opportunitajiet fejn inservu ta’ mudell. Filwaqt li nfittxu li ntejbu l-benesseri tal-komunità akkademika tagħna, impenjati li nsaħħu, niżviluppaw u nikkoperaw mal-intertaqsimiet tal-ġeneru, ir-razza, l-etniċità, id-diżabilità u sferi oħra tad-diversità.

Impenji Strateġiċi III 2020-2025

• Nassistu lill-istudenti u lill-membri tal-istaff b’diżabilità
• Ngħinu lill-istudenti li mhumiex rappreżentati u lill-istudenti l-ġodda
• Navvanzaw id-drittijiet tal-ġeneru u tal-persuni LGBTIQ u nimpenjaw ruħna favur tagħhom
• Niżguraw l-inklużjoni ta’ studenti u membri tal-istaff ta’ kulturi varji
• Inżidu l-promozzjoni tas-saħħa u s-servizzi tal-benesseri
• Ninvolvu l-komunità tal-kampus
• Nippromwovu l-kuntatt mal-pubbliku 

Ngħinu lill-Persuni b’Diżabilità

L-Università tiffaċilita l-aċċess u l-għajnuna biex tiżgura li l-persuni b’diżabilità jkollhom ċans tajjeb li jirnexxu fl-istudji tagħhom. Tipprovdi wkoll l-għajnuna lill-membri tal-istaff u l-viżitaturi. 

Biex intejbu l-aċċessibbiltà, nagħmlu ħilitna biex:

• nagħmlu l-uffiċċji aċċessibbli u nipprovdu r-riżorsi lit-Taqsima tal-Aċċessibbiltà u l-Għajnuna għall-Persuni b’Diżabilità (ADSU);
• nipproponu inizjattivi ġodda li jgħinu lill-membri tal-istaff bi sfidi intellettwali;
• inwettqu verifiki regolari dwar l-aċċessibbiltà, nieħdu azzjoni immedjata meta meħtieġa, u nissorveljaw l-oqsma problematiċi regolarment;
• nipprovdu s-servizz ta’ taxi fuq il-kampus għall-istudenti u l-istaff b’diffikultajiet ta’ mobilità;
• niżviluppaw proċeduri standard tal-operat ‘Xierqa għall-Prattika’ li bihom nevalwaw lill-istudenti qabel ikunu aċċettati biex isegwu korsijiet universitarji speċifiċi; 
• noffru l-għajnuna lill-membri tal-istaff li jkollhom kuntatt ma’ studenti b’diżabilità jew b’diffikultajiet fit-tagħlim, inklużi l-istudenti bid-diżlessja jew li huma fl-ispettru tal-awtiżmu, permezz tal-Uffiċċju għall-Iżvilupp Akkademiku Professjonali (OPAD) u t-Taqsima tal-Aċċessibbiltà u l-Għajnuna għall-Persuni b’Diżabilità (ADSU); 
• niżguraw li d-disinn tal-binjiet il-ġodda jqisu l-ħtiġijiet tal-istudenti li qegħdin f’dan l-ispettru;
• inżidu l-‘kmamar għall-kwiet’ fuq il-kampus.

Noffru l-Għajnuna lill-Istudenti Inqas Rappreżentati u lill-Istudenti l-Ġodda  

L-Università se ttejjeb is-sistemi tal-għajnuna li jsaħħu l-esperjenza tat-tagħlim u jżidu r-rati ta’ studenti bi sfondi diversi u inqas rappreżentati li jtemmu b’suċċess il-korsijiet universitarji. L-istudenti minn ambjenti soċjoekonomiċi inqas privileġġati, minn minoranzi, u l-istudenti l-ġodda jsibuha aktar diffiċli biex iħossuhom parti mill-komunità tal-Università. Għalhekk, se nipprovdu infrastruttura ta’ sapport biex niżviluppaw l-identità personali bħala sors ta’ qawwa u biex inrawmu relazzjonijiet fost gruppi ta’ studenti f’ambjenti akkademiċi u soċjali fuq il-kampus.

Navvanzaw id-Drittijiet tal-Ġeneru  

L-Università impenjata li tavvanza d-drittijiet tal-ġeneru u tal-persuni LGBTIQ. Għal dan il-għan, nipproponu li:

• inwettqu verifiki regolari dwar l-ugwaljanza tal-ġeneru;
• noffru viżibbiltà akbar lill-Kumitat għall-Kwistjonijiet tal-Ġeneru ħalli jingħata s-setgħa biex jaħdem fuq il-kwistjonijiet relatati mal-integrazzjoni tal-ġeneru fi ħdan il-kurrikulu bl-għajnuna tal-Uffiċċju OPAD;
• nippromwovu iżjed il-Politika dwar il-Fastidju Sesswali li daħlet fis-seħħ fl-Università u fil-Kulleġġ Ġan Franġisk Abela biex isservi ta’ mudell għal dokumenti oħra ta’ politika għal setturi oħra lil hinn mill-Università;
• noħolqu diskussjoni fuq l-isfidi relatati ma’ ġeneri speċifiċi fuq il-kampus, f’dak li għandu x’jaqsam mal-promozzjoni;
• nindirizzaw id-diskrepanza tal-ġeneru f’suġġetti bħall-inġinerija, l-edukazzjoni u l-kura tas-saħħa;
• noħolqu depożitorju fil-librerija li jaħżen dokumenti storiċi relatati mal-avvanz tad-drittijiet tal-ġeneru;
• nipprovdu toilets newtrali għall-ġeneru.

Nippromwovu d-Diversità  

L-Università hija komunità multikulturali li fiha qed jiżdiedu ħafna studenti u membri tal-istaff internazzjonali b’kulturi differenti. Il-Kumitat għar-Razza u l-Affarijiet Etniċi ġie stabbilit biex irawwem kuxjenza, jiżgura l-aċċess u l-integrazzjoni, jissalvagwardja lill-istudenti u lill-membri tal-istaff u jagħti l-pariri lir-Rettorat. Se nimpenjaw ruħna biex:

• nippromwovu l-benefiċċji tad-diversità, inklużi tar-razez u tal-etniċità;
• niżguraw li jkun hemm faċilitajiet adekwati għal persuni ta’ twemmin differenti;
• nippromwovu programm ta’ attivitajiet maħsub biex tinħoloq kuxjenza akbar u jħeġġeġ bidla fil-mentalita’; 
• nappoġġjaw sistema ta’ sieħba għall-istudenti u l-istaff internazzjonali.

Se nibqgħu nissorveljaw u nevalwaw l-implikazzjonijiet tal-migrazzjoni fis-settur edukattiv. Ir-Rikonoxximent tat-Tagħlim Preċedenti għandu jgħin lill-istudenti bi status ta’ refuġjat, jew lil dawk li qed ifittxu kenn f’Malta, biex japplikaw u jkunu jistgħu jidħlu għall-korsijiet. Dan jikkontribwixxi għall-isforzi nazzjonali ta’ integrazzjoni permezz ta’ korsijiet, inizjattivi ta’ kuntatt u kollaborazzjoni ma’ entitajiet oħra relevanti.

Inżidu s-Servizzi tas-Saħħa u tal-Benesseri  

Kampus inklużiv itejjeb il-benesseri u jakkomda l-ħtiġijiet uniċi ta’ individwi differenti.  Id-dokumenti ta’ politika bl-aħjar prassi għad-diversità u l-inklużjoni jagħrfu li s-saħħa mentali u l-benesseri huma kwistjonijiet ta’ diversità. L-azzjonijiet proposti huma biex: 

• intejbu s-servizzi ta’ konsulenza u appoġġ għas-saħħa mentali, flimkien ma’ programmi dwar kif għandek tgħix ħajja b’saħħitha mnedija miċ-Ċentru għas-Saħħa u l-Benesseri;
• insiru Università li tippromwovi s-saħħa, kif rikonoxxut mill-Organizzazzjoni Dinjija tas-Saħħa, u għal dan il-għan, se jkunu meħtieġa s-servizzi ta’ ħaddiem/a soċjali, ħaddiem/a li jaħdmu maż-żgħażagħ, u infermier/a;
• nipprovdu sessjonijiet regolari għall-istudenti dwar l-immaniġġjar tal-istress fi żmien l-eżamijiet; 
• inkomplu norganizzaw korsijiet spissi tal-Ewwel Għajnuna għas-Saħħa Mentali kemm għall-istaff kif ukoll għall-istudenti;
• insegwu l-linji gwida għall-membri tal-istaff dwar kif jgħinu lill-individwi f’diffikultajiet kbar billi noffrulhom it-taħriġ meħtieġ.  

Ninvolvu l-Komunità tal-Kampus  

Ambjent inklużiv jippromwovi prattiċi pożittivi għall-istudenti u għar-reklutaġġ tal-istaff, inizjattivi ta’ mobilità soċjali u programmi li jattiraw parteċipanti mis-setturi kollha tas-soċjetà. L-Università tipproponi li:

• nagħmlu sforz biex intejbu l-komunikazzjoni interna u esterna biex niżguraw li jkun hemm inqas xogħol doppju, kordinazzjoni aħjar u iżjed sinerġija, kif ukoll li tiġi implimentata strateġija għall-komunikazzjoni b’indikaturi ewlienin għall-kejl tal-prestazzjoni;
• nappoġġjaw l-għaqdiet rikonoxxuti tal-istudenti billi niżguraw li jkun hemm disponibbli riżorsi adekwati, inkluż il-possibbiltà ta’ ħaddiem/a li jaħdmu maż-żgħażagħ biex jassistuhom;
• infasslu skemi ta’ taħriġ u gwida fuq il-kampus; 
• nippromwovu aktar għarfien dwar il-Politika dwar l-Ibbuljar u l-Fastidju;
• nippromwovu lingwa inklużiva fuq il-kampus;
• niżguraw li l-korsijiet ta’ filgħaxija jkopru l-ħtiġijiet u l-interessi tal-istudenti part-time, u nikkunsidraw li noffru programmi full-time ta’ matul il-jum b’mod flessibbli, fuq bażi part-time, meta jkollhom bżonn l-istudenti.

Nippromwovu l-Kuntatt mal-Pubbliku  

L-Università tinvolvi ruħha f’għadd ġmielu ta’ attivitajiet ta’ kuntatt kemm mal-gruppi fi ħdanha kif ukoll mal-komunità nazzjonali usa’. Dawn l-attivitajiet għandhom l-għan li jkattru l-interess tal-pubbliku fl-edukazzjoni ogħla u li jħeġġuhom ikomplu jistudjaw ħalli jiksbu kwalifika biex javvanzaw fil-karriera. Se nistinkaw biex:

• inwessgħu l-opportunitajiet ta’ tagħlim elettroniku mill-bogħod billi nipprovdu varjetà ta’ modalitajiet ta’ tagħlim;
• inżidu l-kuntatt mal-Università tat-Tielet Età;
• nestendu s-servizzi offruti miċ-Ċentru għar-Riżorsi fil-Kottonera, li jinkludu s-servizzi ta’ konsulenza u ta’ klinika legali f’lokalitajiet fin-naħat ta’ fuq ta’ Malta madwar il-Port, Buġibba, il-Qawra u Għawdex;
• nikkunsidraw li nestendu servizzi speċifiċi ta’ kuntatt bħal dawk offruti mit-Taqsima Mobbli tad-Dentisti;
• inwaqqfu Ċentru tal-Viżitaturi fil-Kampus tal-Belt biex nenfasizzaw il-legat tal-Università u nippromwovu l-proġetti tagħha mill-qalba tal-belt kapitali;
• nevalwaw mill-ġdid il-kunċett ta’ CAMPUS FM u r-rivista THINK bil-ħsieb li  nagħmlu dawn il-mezzi iżjed effettivi; 
• ninvolvu l-oqsma tal-arti u l-istudji umanistiċi f’‘Science in the City’ għal firxa usa’ ta’ setturi multidixxiplinarji; 
• nagħtu l-ħajja mill-ġdid lil sforzi bħall-‘University in Piazza’; 
• intejbu l-kollaborazzjoni ma’ entitajiet mhux governattivi, partikolarment mas-soċjetà ċivili u l-industrija.